Kona-ba PNUD iha Timor-Leste

A long of young men and women holding traditional fabricsUniversitariu sira prepara hase SG ONU Ban Ki-moon durante nia visita mai Timor--Leste iha 2012. Foto: Sandra Magno/UNDP TL.

Dezde tinan 1999, PNUD foo tulun ona ba Timor oan sira muda husi rekuperasaun depoisde konflitu ba dezenvolvimentu mak sustentavel. PNUD nia Programa Planu Asaun ba Nasaun (2009-2013), dezenvolve parseria no aprova ona husi governu Timor-Leste, ho objetivu atu harii baze ba dame, estabilidade no seguransa mak dura ba tempu naruk.

Akordu Asisténsia Padrau Baziku (SBAA) ne’ebé asina ona iha loron restaurasaun independensia 20 Maiu 2002, hatudu ona uluk tiha ona kuadru servisu PNUD nian iha rai laran no mos operasaun PNUD nian iha Timor-Leste ne’ebé sei mak sei kontinua nafatin iha baze legal.

Saida mak ami hakarak atu realiza?

PNUD rekoñese katak governu Timor-Leste mak responsabiliza ulukliu ba programa dezenvolvimentu nasionál. Programa Planu Asaun ba Nasaun (2009-2013) agora dadaun nee, halo planu hamutuk parseria ho institusaun nasaun nian, hodi responde ba prioridades Governu Timor-Leste nian ba periodu nee.

PNUD Timor-Leste nia programa iha área haat, ho projetu individual ne’ebé mak iha pasta servisu ida-idak nee planu tuir objetivu tuir mai nee: hakiak kultura governasaun demokrátiku, hamenus moris-kiak, maneija rekursu ambiental no prevene ho rezolve konflitus.

Programa Planu Asaun ba Nasaun mos refleta objetivu prinsípal husi United Nations Development Assistance Framework (UNDAF) 2009-2013.

Saida mak ami nia rezultadu?

Eleisaun ho dame ne’ebé  halao iha tinan 2012, suporta husi governu nia institusaun nasionál ba eleisaun rua no mos kontinua hetan suporta husi PNUD. Institusaun nasionál, la eziste iha tinan 1999, agora sei mantein nafatin demokrásia iha nasaun foun ida nee. PNUD servisu besik liu ho Ombudsman Justisa no Direitus Umanus, Parlamentu, institusaun setór-justisa nian no Komisaun Anti-Korupsaun, ajuda organizasaun hirak nee atu bele atinji sira nia objetivu agora no halo planu ba objetivu ba longuprazu nian.

Ho suporta husi PNUD ba projetu harii dame, projetu jestaun hamenus dizastre no diálogu komunidade no inisiativu ba fasilitasaun ne’ebé suporta ona parseiru nasionál oioin, inklui Ministériu Solidariedade Sosiál, tan sira servisu atu haforsa koezaun sosiál iha sosiedade pós-konflitu. PNUD mos foo asisténsia ba institusaun governu nian ba promosaun diálogu komunidade atu prevene no maneija konflitu, rekupera husi dizastre naturais no haforsa koezaun sosiál no rezisténsia iha sosiedade pós-konflitu nia laran.

Iha setór hamenus mukit, PNUD ajuda feto no mane sira ne’ebé mai husi komunidade mukit atu bele lori sira sai husi moris mukit nia laran no harii rendimentu mak sustentavel ba sira nia aan no ba sira nia  familia liu husi mikro-finansa (hamutuk ho UNCDF), grupu poupansa osan, negósiu sosiál, inklui kooperativa no empreza husi tamaño kiik to médiu.

Ho suporta husi PNUD, Timor-Leste halo kompleta ona nia Programa Asaun  dahuluk Adaptasaun Nasionál ba Mundansa Klima. Programa nee fornese ba Timor-Leste mapa dalan nian hodi bele ajuda nasaun trata ho mudansa klima, identifika risku no vulnerabilidade dezastre naturais mak relevante no foo sai ezbosu lista sasukat hodi servisu hasoru rezisténsia mudansa klima. Timor-Leste mos dezenvolve ona Planu Asaun & Estratéjia Nasionál ba Biodiversidade, liu husi avaliasaun liña baze husi biodiversidade Timor-Leste nian ne’ebé halao tiha ona. 

Sé mak foti desizaun?

Señor Knut Ostby mak hanesan Koordenador Rezidente ONU. Señora Mikiko Tanaka mak hanesan Diretora Nasionál UNDP nian iha Timor-Leste. Vise Diretora ba Programa no Operasaun mak Señora Noura Hamladji; no Jerente Operasaun mak Ermira Basha.

Lider ba programa sira mak responsabiliza ba programa haat iha área ida-idak – governasaun demokrátiku (Farhan Sabih), rekuperasaun no prevensaun krize (Jose Belo), polítika pro-kiak (Rui Gomes), hamenus kiak (Justino da Costa) no ambiente (Nicolas Kroger). Jestor sira seluk haree ba iha administrasaun no unidade ne’ebé suporta finansa, rekursu umanu, IT, administrasaun, media, aprovizionamentu, no seguransa. Desizaun programa nian foti iha konsultasaun hamutuk ho institusaun parseiru iha Governu Timor-Leste no doadores no parseiru sira seluk, liu husi planeamentu jestaun jerensial ne’ebé harii tiha ona iha akordu ne’ebé asina entre UNDP ho Governu Timor-Leste.

Ami iha nain hira?

Staf PNUD nian mak agora dadaun iha Timor-Leste

Tipu Kontratu

Sub-total

Kontratu Permanente (Full-time appointment (FTA))

63

Servisu Kontratadu (Service contract (SC))

79

Voluntáriu Nasoens Unidas (UN Volunteer (UNV))

10

Total

152